KAMPANJA

Në Komunën e Gjakovës ekziston vetëm një shkollë publike e muzikës, “Prenk Jakova”. Kështu, për arsye të interesimit të madh të nxënësve për tu regjistruar në këtë shkollë të muzikës, është parë e nevojshme që të hapet edhe një objekt tjetër privat i shkollës së muzikës për nxënësit e të gjitha moshave. Përmes kësaj shkolle do të ngriten kapacitetet në mënyrë profesionale të nxënësve, përmes degëve të studimit si në instrumente të violinës, pianos, flautës, klarinetit, kitares, etj.

Drejtori ekzekutiv i shkollës së muzikës private “In Tune”, Dalvin Mamusha është violist i talentuar i cili ka marrë pjesë në shumë koncerte tradicionale në Kosovë dhe jashtë saj. Është anëtar i grupit, “Don’t Listen to your Neighbors”, dhe si violinist ka përformuar në festivale të ndryshme (Kosovë, Zvicër, Francë, Gjermani dhe Serbi), është violinist në grupin “Pirolo”, ka mbajtur Summer Master Classes në Burgundy të Francë, ka marrë mirënjohje nga shkolla e mesme dhe e ulët e muzikës “Prenk Jakova”, etj.

Cili është qëllimi?

Qëllimi i projektit është të shërbejë për edukimin muzikor dhe përgatitjen e nxënësve për shkollimin e mëtejmë në arsimimin e lartë. Pra, nxënësit që përfundojnë këtë shkollë janë të përgatitur për shkollim univerzitar në muzikë, përmes mësimeve që do të ofrohen nga shkolla “In Tune”. Kështu, për arritjen e qëllimit të sipër përmendur sfidë mbetet një ambient që i plotëson të gjitha kushtet, sepse është shumë e rëndësishme që ata të mësojnë, krijojnë dhe punojnë në një ambient kreativ dhe artistik.

Me hapjen e shkollës private së muzikës “In Tune”, të rinjtë do të marrin pjesë në aktivitete te ndryshme kulturore të organizuara nga OJQ dhe institucionet lokale dhe shkollat tjera të muzikës. Po ashtu, “In Tune” synon të organizoj edhe aktivitete të ndryshme kulturore në Kosovë dhe jashtë saj.

Si do të ndihmojë përkrahja juaj?

Përmes përkrahjes suaj, do të mundësohet financimi i pajisjeve të cilat do të shërbejnë për nxënësit dhe stafin e Shkollës. Pra që të finalizohet puna jonë, nevojiten banka, karrika, pulta, instrumente për fëmijë, sanitaria, etj.

Përmes Shkollës “In Tune” muzicientët e ri do të promovojnë dhe ruajnë vlerat kulturore tradicionale shqiptare. Pra, përfituesit kryesor të këtij projekti do të jenë nxënësit, muzicientët e ri.

Shkolla “In Tune” synon të bashkëpunojë me Komunën e Gjakovës, gjegjësisht Drejtorinë e Kulturës, Drejtorinë e Arsimit, Shkollën e Muzikës “Prenk Jakova” në promovimin e vlerave kulturore klasike por edhe tradicionale.

Buxheti

Total € 3 500,00