KAMPANJA

Rreth meje

Përshëndetje, unë jam Uta Ibrahimi, e lindur dhe e rritur në Kosovë. Në vitin 2017, unë u bëra gruaja e parë shqiptare që pushtoj Everestin (8,848m) dhe Manasulun (8,163m), dy nga majat më të larta në vargun e Himalajeve – dhe kjo është ku lindi ideja për të ngjitur të gjitha 14 majat (ose “tetëmijeshet”).

Deri tani, ekspeditat më kanë çuar në malet e shumë vendeve. Disa pej tyre janë: Musala, 2,925m (Bullgari); Olimpi, 2,918m (Greqi); Jezera, 2,694m (Shqipëri); Triglavi, 2,998m (Slloveni); Tito VRV, 2,745m (Maqedoni); Gjeravica, 2,656m (Kosovë); Ercyes, 3,916m (Turqi); Hasan dag, 3,200m (Turqi); Emler, 3,500m (Turqi); Mont Blanc, 4,880m (Francë); Maja Jalung, 5,700m (Himalaje); Maja Nurbu, 5,800m (Himalaje); Maja Ramdung, 5,925m (Himalaje).

Në vitin 2015, dashuria për natyrën e vendit tonë më bëri t’i ndërpreja punët në sektorin e marketingut dhe të vazhdoja në sektorin e turizmit. Që atëherë kam vazhduar me një numër të madh të ecjeve në natyrë, të tureve me bicikleta, të vrapimeve malore dhe të ngjitjeve në shkëmbinj. Kam qenë pjesë e shumë projekteve për turizëm, ndër to projekti i USAID-it dhe “Via Dinarica”, ai i turizmit ndërkufitar në Malin e Sharrit (GIZ) dhe Reel Rock Festival 2015 (i financuar nga Ambasada Amerikane). Nëpërmjet kompanisë sime, Butterfly Outdoor Adventure, shoqëroj grupe të turistëve dhe të gazetarëve, të huaj e vendas, në Kosovë e Shqipëri, dhe vazhdoj të kontribuoj për krijimin dhe zhvillimin e komunitetit të ngjitësve në Kosovë e Shqipëri, duke mbështetur krijimin e shtigjeve të reja të ngjitjes.

Jetën ia kam kushtuar nxjerrjes në pah të bukurive të natyrës dhe të maleve tona. Rutinat e trajnimit tim, përvoja në male, vendosmëria e vazhdueshme si dhe ndihma juaj do të më shtyjnë për ta arritur qëllimin që vetëm pak njerëz e arrijnë – ngjitjen e të gjitha 14 majave tetëmijëshe të Himalajeve.

Ekspedita

Kjo fushatë për ngritjen e fondeve është për majën e tretë dhe të katërt (ngjitjet për vitin 2018) në vargmalet e Himalajeve. Të dyja janë maja shumë të vështira – Maja Lhotse, e katërta më e lartë në botë (planifikuar për muajin maj), si dhe e dyta më e lartë, K2 (planifikuar për muajin gusht). K2 është jashtëzakonisht e vështirë për shkak të shtigjeve shumë të pjerrëta dhe për shkak se shumë pak njerëz arrijnë ta ngjesin.

Ekspedita e plotë është ngjitja e të gjitha 14 majave mbi 8,000 metërshe deri në vitin 2023, me lartësi totale prej 101,746 metrash. Plani im është që të pushtoj nga dy maja në vit, për 6 vitet e ardhshme.

Arsyeja e ekspeditës

Së pari, dëshiroj që nëpërmjet përvojës dhe rrjetit të komunikimit që krijoj, të ngre vetëdijen për malet dhe natyrën e Kosovës dhe të Shqipërisë tek turistët nga e gjithë bota. Le t’i ftojmë të gjithë të na i vizitojnë malet e majat tona. Si alpiniste femër dua të ngre vetëdijen edhe për çështjet gjinore në shoqërinë tonë. Po, është e mundshme që një femër shqiptare të ngjitet në Mont Everest, majën më të lartë të botës. Dua të motivoj sa më shumë vajza që të arrijnë të ngjiten në male dhe maja. Dua të sjell shpresë, t’i frymëzoj njerëzit për t’i pushtuar majat e tyre, pavarësisht se çfarë sfidash personale mund të kenë.

Ekspeditat e mia duhet të shihen si arritje për Kosovën dhe kombin shqiptar në tërësi. Gjithmonë do t’i valoj të dy flamujt në çdo majë, që ma kujtojnë vendin tim dhe atë që mund ta arrijmë.

Ndihma juaj

Kjo është një ekspeditë e vështirë në shumë aspekte. Çdo ngjitje në majë kërkon muaj të planifikimit, trajnimit, kërkimit të burimeve, por edhe kërkimit të thellë shpirtëror. Për majën e tretë dhe të katërt, kam nevojë për gjithsej 15,000 euro. Në vijim janë kostot e mia të zbërthyera: