KAMPANJA

Kush jemi ne?

“Linja e Jetës” është një linjë për parandalimin e vetëvrasjeve e themeluar në nëntor të vitit 2019  nga QIPS. Në këto momente, “Linja e Jetës” është i vetmi shërbim emergjent i tillë që punon me persona të cilët sfidohen nga mendimet për vetëvrasje. “Linja e Jetës” është aktive çdo ditë nga ora 18:00 deri në 02:00 (gjithashtu gjatë pushimeve). Në Linjë, 29 vullnetarë janë trajnuar duke përdorur metoda të bartura nga “113”, linja për parandalimin e vetëvrasjeve në Holandë. Gjatë një thirrjeje, vullnetarët fokusohen në de-eskalim dhe përkrahje emocionale e cila i jep thirrësit ndihmesë afatshkurtër, që ia jep mundësinë për të analizuar në mënyrë racionale situatën në të cilën gjenden. Më vonë gjatë thirrjes, ne gjithashtu i drejtojmë për ndihmë afatgjate tek psikoterapeutët dhe psikiatërit e besueshëm.

Në Kosovë, një nga faktorët i cili më së shumti ndikon në aftësinë e një personi për të kërkuar ndihmë, është stigma rreth shëndetit mendor. Shpeshherë personat të cilët kanë nevojë për ndihmë, e shtypin vetën për shkak të reagimeve nga familjarët apo shoqëria dhe antipatisë së shoqërisë kosovare ndaj sfidave të tyre. Si rezultat, ata nuk kërkojnë ndihmë nga frika se mund të emërtohen si të “trentë” apo “mosmirënjohës” nga të afërmit e tyre. Gjithashtu, sfidat e tyre rreth shëndetit mendor apo mendimeve për vetëvrasje vetëm se e vështirësojnë më shumë kërkimin e ndihmës në mënyrë sekrete. Me situatën e shkaktuar nga COVID-19, këto probleme veçse janë fuqizuar, pasi që ata të cilët vetëm kanë përjetuar probleme rreth shëndetit mendor, janë shkëputur nga sistemet e tyre për përkrahje dhe ballafaqohen me stres të shtuar nga frika e një pandemie globale.

Çdo ditë, personat me mendime për vetëvrasje kanë vështirësi të gjejnë përkrahje nga të dashurit e tyre për shkak të frikës nga hapja e këtyre temave, apo prej ndjenjës se janë “barrë” për ta. Barriera të tjera të cilat e pamundësojnë kërkimin për ndihmë, të cilët vijnë nga stigma e shoqëruar për shëndetin mendor, mund t’ua shkaktojnë ndjenjën se janë të burgosur dhe ta pasqyrojnë vetëvrasjen si zgjidhje të problemeve. Pikërisht kjo është pse shërbimi ynë është kaq esencial, pasi që jep një hapësirë anonime dhe të sigurt për thirrësit tanë, në mënyrë që ata ta lirojnë barrën e tyre dhe të drejtohen në vende të cilat mund të japin ndihmë profesionale dhe afatgjatë.

Me gjithë këtë në mendje, ekipi ynë është i motivuar që të kryejë punën më të mire të mundur gjatë çdo telefonate. Ne ndihemi të privilegjuar që mund të ndihmojmë thirrësit tanë në momentet e tyre më të errëta dhe t’ua rikujtojmë se gjithë është dikush gati për të dëgjuar pa gjykime.

“Linja e Jetës” beson fuqishëm në të drejtën e çdo personi për t’u ndjerë i dëgjuar dhe për të pasur dikë që e përkrah. Vullnetarët tanë janë të gatshëm dhe të motivuar që t’u japin ndihmë emocionale atyre që kanë nevojë në një hapësirë plotësisht anonime dhe konfidenciale. Ne gjendemi në ballë të luftës kundër vetëvrasjes dhe nuk do të ndalemi në avokimin e të drejtave të personave të cilët sfidohen me këto mendime.

Duke u bazuar në raportet e policisë së Kosovës, gjatë 20 viteve të fundit ka pasur më shumë se 1000 vetëvrasje në Kosovë dhe mbi 3000 tentime për vetëvrasje. Kjo do të thotë se mesatarisht e kemi një vetëvrasje për çdo javë gjatë 20 viteve të fundit. Në gjysmën e pare të vitit 2020 kanë qenë 18 vetëvrasje dhe 53 tentime. Na ndihmoni që të vazhdojmë punën tonë drejt një Kosove ku këta numra do të jenë sa më të ulët.

Si do të ndihmojë përkrahja  juaj? (Rezultatet)

Ne do të implementojmë trajnime për vullnetarët aktivë nga partnerët tanë në 113 (linja telefonike Holandeze) për të përmirësuar dhe avancuar teknikat tona për aktivitetet e përditshme. Çdo javë për 12 muaj ne do të facilitojmë terapitë grupore për vullnetarët tanë dhe mirëqenien e tyre. Për më tepër, do të investojmë në pajisje dhe intervenime të hapësirës të cilat do të ndikojnë direkt në rritjen e kapacitetiteve tona. Përmes kësaj dhe strategjive të vullnetarëve, do të fillojmë të shohim një rënie të niveleve të vetëvrasjeve. Do të përgatisim fushata avokuese, qoftë fizike apo online për të nxitur dikutime për vetëvrasjet dhe shëndetin mendor në Kosovë të cilat mund të diskutohen pa stigmatizim, paralelisht si një përgjigje ndaj Covid-19, ku ne adresojmë këto çështje në komunitetet që vuajnë si nga mirëqenia fizike ashtu edhe nga ajo mendore.

Për çka kemi nevojë?