Campaign Story

Kush jemi ne?

Fondacioni Liga e Krijuesve Kosovarë – Kosova Makers League (KML) është platformë edukative jo-formale e cila organizon garën më të madhe të robotikës për shkollat fillore dhe institucionet e tjera edukative të Kosovës që punojnë me fëmijë të grupmoshave 6-15 vjeç.

Përmes organizimit të garës më të madhe të robotikës, KML u jep mundësinë të gjithë fëmijëve pa dallim të bëjnë hapat e parë në fushën e robotikës dhe të realizojnë aktivitete të ndryshme me fokus në fushat STEAM (Shkencë, Teknologji, Inxhinieri, Art dhe Matematikë).
Deri më sot, KML ka shpërndarë gjithsej 2100 robotë edukativ falas për 234 institucione edukative të 30 komunave të Kosovës, prej të cilave janë përfshirë mbi 4500 nxënës dhe mbi 500 mësimdhënës.

Për katër vite me radhë në garën e robotikës janë përdorur robotët edukativ mBot, kurse që nga shtatori i vitit 2022, liga është përditësuar me pajisjen e re micro:Maqueen Plus. Kjo pajisje e re ka kosto më të ulët, ofron programimin në dy gjuhë programuese dhe funksionon me anë të pllakës micro:bit, me të cilën shumica e shkollave fillore publike veçse janë të pajisura.
Duke qenë organizatë jo-përfituese, KML tërë mbështetjen e saj ndër vite e ka arritur përmes donacioneve të ndryshme të ofruara kryesisht nga donatorë të huaj.
Këtë vit, gara e robotikës po mbështetet nga Ambasada e Amerikës në Kosovë.

Cili është qëllimi ynë?

Qëllimi ynë kryesor është sigurimi i sa më shumë robotëve edukativ në mënyrë që të shpërndahen falas në shkollat fillore publike të Kosovës, duke arritur kështu digjitalizimin e tyre. Kjo do të mundësonte që sa më shumë fëmijë të përfshihen në një qasje të re të edukimit, ku teknologjia përdoret vetëm si mjet për të nxitur te fëmijët të menduarit kritik dhe kreativ, punën në grup dhe komunikimin, aftësi këto të domosdoshme për të përballuar sfidat e shekullit në të cilin po jetojmë.

Përmes kampanjës “një robot për çdo fëmijë”, ne synojmë të arrijmë pajisjen e të paktën 50% të shkollave fillore publike në vend, kështu që sa më shumë fëmijë të moshave 6-15 vjeç të mund të prekin botën e robotikës.

Në këtë mënyrë, në shkollat fillore publike të vendit do të krijohet një ambient gjithpërfshirës dhe i shëndoshë, ku fëmijët pa dallim gjinie, moshe dhe etnie ndihen të lirë të eksplorojnë dhe të frymëzohen si liderë të ardhshëm në shkencë dhe teknologji.

Si do të na ndihmojë mbështetja juaj?

Deri më sot, përmes donacioneve KML ka arritur që të pajisë 25% të shkollave fillore të Kosovës me robotë edukativ falas, duke i përfshirë në garën tonë edukative.
Përmes mbështetjes suaj, ne do të mund të arrijmë përfshirjen e të paktën 50% nga totali i shkollave fillore publike në vend.
Prandaj, fondacioni ynë ju fton që t’i bashkoheni kampanjës “një robot për çdo fëmijë” që bashkarisht ta bëjmë të mundur këtë. Ne ju jemi mirënjohës nëse vendosni të kontribuoni, por jo vetëm, ne ju jemi falënderues nëse ju e shpërndani kampanjën tonë me shoqërinë tuaj.

Buxheti

QËLLIMET E SHTUARA

• * Sipas statistikave të Ministrisë së Arsimit në Kosovë, për vitin shkollor 2021/22 janë të regjistruara 878 shkolla fillore dhe të mesme të ulëta publike.
• * Në Garën e Robotikës Kosova Makers League Open janë të regjistruara gjithsej 212 shkolla fillore dhe të mesme të ulëta publike.
• * Për të arritur qëllimin e dixhitalizimit të të gjitha shkollave fillore publike në Kosovë, në garën tonë duhet të përfshihen edhe 666 shkolla të tjera duke u pajisur me robotë edukativ falas.
• * Për të arritur këtë, KML ka përgatitur edhe dy qëllime të shtuara në rast të arritjes së qëllimit parësor me buxhetin e lartëcekur.

KONTRIBUTI JUAJ NËSE

ROBOTI MICRO:MAQUEEN PLUS

AFATI KOHOR

EKIPI I KOSOVA MAKERS LEAGUE