KAMPANJA

Programi i Mëngjesit në Radio Telivizionin e Kosovës po nis një fushatë të re për mbledhjen e fondeve me qëllim krijimin e këndeve rekreative në shkollat fillore të zonave rurale të Kosovës. Kjo nismë, e quajtur “Mëso dhe Luaj”, synon të transformojë mjediset shkollore në hapësira tërheqëse për mësim dhe lojë, duke ofruar më shumë mundësi për nxënësit të zhvillohen si në aspektin arsimor ashtu edhe në atë social.

Me pjesëmarrjen tuaj, ju ftojmë të kontribuoni financiarisht për të siguruar pajisjet e nevojshme dhe për të ndihmuar në krijimin e këndeve rekreative që do të përmirësojnë përvojën shkollore të nxënësve nëpër shkolla fillore. Çdo kontribut bëhet përmes një procesi plotësisht transparent, ku çdo donacion do të ketë ndikim të drejtpërdrejtë në krijimin e këtyre hapësirave.

Pse “Mëso dhe Luaj”?

Këndet rekreative janë esenciale për të krijuar një ambient më tërheqës dhe motivues për fëmijët, veçanërisht në zonat rurale. Ato nuk janë thjesht hapësira për lojë – janë mundësi për stimulim, për zhvillimin e aftësive sociale dhe për të nxitur angazhimin ndaj shkollës. Këto kënde janë krijuar për të ofruar një balancë të shëndetshme mes mësimit dhe lojës, duke përforcuar lidhjen e nxënësve me shkollën dhe për të parandaluar braktisjen e saj.

Çfarë ofrojnë këto kënde?

• Hapësira të dizajnuara për aktivitete të ndryshme, përfshirë leximin, artet dhe lojërat.
• Lojëra dhe aktivitete fizike, si ping pong, për të promovuar shëndetin fizik dhe mendor.
• Kënde bashkëpunimi dhe zhvillimi social, ku fëmijët mund të mësojnë duke luajtur në grupe, duke forcuar aftësitë e tyre komunikuese dhe sociale.
• Mini-librari dhe kënde leximi, që inkurajojnë nxënësit të eksplorojnë botën përmes librave dhe të forcojnë dashurinë për dijen.
• Hapësira të gjallëruara, me mure të ngjyrosura që krijojnë një atmosferë të ngrohtë dhe motivuese për fëmijët.

Varësisht nga fondet që do të mblidhen, synojmë të ofrojmë për çdo shkollë:

1. Një tavolinë ping pongu
2. Kënd leximi me shilte të rehatshme
3. Kënd mini-librarie
4. Dekorimin dhe ngjyrosjen e hapësirave për të krijuar një atmosferë të gjallë dhe mikpritëse

Shuma e kërkuar është 3,300 € ku përfshihet edhe 10% i administrimit të kampanjës në platformën KOSOVAideas.

Si mund të kontribuoni?

Kontributi juaj mund të bëjë një ndryshim të madh në jetën e fëmijëve të zonave rurale të Kosovës. Çdo ndihmë, sado e vogël, do të ndihmojë në ndërtimin e një të ardhmeje më të ndritur për gjeneratat e reja. Bashkohuni me ne dhe bëhuni pjesë e kësaj nisme për të krijuar një ambient më të lumtur, më të shëndetshëm dhe më motivues për nxënësit tanë.

Ekipi i projektit

Trëndelinë Bucolli     Valtona Kelmendi     Radio management

Autore                                 Autore