KAMPANJA

GALERIA 17

Shtatëmbëdhjetë si vazhdimësi e realizimit të misionit të vet dhe kontributit në skenën artistike po i sjell Prishtinës një hapësirë të re ekspozuese, Galerinë 17. Galeria do të ketë fokus të veçantë në çështjet sociale. Artistët/et dhe kuratorët/et do të ftohen të eksperimentojnë me konceptet, idetë dhe hapësirën, duke ofruar ekspozita të guximshme që krijojnë dialog dhe nxisin diskutime publike.

Kush jemi ne?

Shtatëmbëdhjetë (17) është organizatë joqeveritare e themeluar në Prishtinë, Kosovë në vitin 2018. Duke u bazuar në eksperiencë dhe nevojën për të rifunksionalizuar hapësirat publike alternative, Shtatëmbëdhjetë, është regjistruar si fondacion i cili mëton të sjell ndryshime pozitive në shoqëri nëpërmjet mundësimit të vitalitetit kulturor dhe kreativitetit. Misioni ynë është të nxisim aktivizmin kulturor për zhvillimin shoqëror. 17 ka tre programe: Arti & Kultura, Aktivizmi Qytetar dhe Project Space. Shtatëmbëdhjetë gjendet në Prishtinë, por mbulon gjithë rajonin e Kosovës me aktivitetet e veta.

Deri më tani, 17, numëron një mori iniciativash të vetë-organizuara, duke krijuar mundësi për zhvillimin e artit dhe kulturës, si dhe duke inkurajuar qytetarë/e në vend për pjesëmarrje në jetën publike nëpërmjet artit, kulturës, edukimit, qytetarisë aktive dhe përfshirjes.

Cili është qëllimi ynë?

Të nxitur nga një skenë e pavarur artistësh të talentuar e të motivuar, pa një sistem të qëndrueshëm arti dhe me një infrastrukturë minimale të artit bashkëkohor, Shtatëmbëdhjetë ka marrë përsipër të ri-artikuloj gjithë veprimtarinë e vet duke e përfshirë edhe Galerinë 17. Galeria 17 vjen si dëshirë dhe nevojë për gjithëpërfshirje dhe qëndrueshmëri të një skene artistike në fermentim, ku nevoja për hapësira të reja të eksperimentimit është jetësore. E gjetur jo në qendër, por në njërën nga lagjet më të vjetra të kryeqytetit, Galeria vjen si hapësirë e një guaske që lind me moluskun dhe rritet, përshtatet dhe transformohet në varësi të nevojave të zhvillimit sikurse edhe hapësira e përbashkët publike reflekton strukturën tonë shoqërore në brendësi të labirinteve të progresit urban. Andaj, ofrimi i një hapësire gjithëpërfshirëse në kërkime, edukim, aktivizëm, eksperimentime artistike si dhe krijimi i kushteve për përfaqësim të artit dhe artistëve/eve mbetet qëllim në vete.

Misioni i Galerisë 17 është të nxit reflektim kritik përmes identifikimit dhe përkrahjes së zërave të guximshëm që mundësojnë këndvështrime të reja përmes praktikave bashkëkohore të artit.

Si do të ndihmojë përkrahja juaj?

Me mbështetjen tuaj, ne do të jemi në gjendje  ta vazhdojmë renovimin e hapësirës, e cila do të shërbej jo vetëm si galeri por edhe hapësirës eksperimentuese për artistë/e. Përkrahja juaj përveç se do të na ndihmoj ta bëjmë  hapësirën e shfrytëzueshme, në afatshkurtë dhe afatgjatë do të kontribuojnë në krijimin e  kushteve për  kërkime, edukim, aktivizëm,  dhe eksperimentime artistike.

Përkrahja juaj do t’i shtojë vlerë këtij projekti dhe do të ngrejë zërin për rëndësinë e institucioneve të pavarura dhe gjithëpërfshirëse, të cilat ofrojnë struktura cilësore në shërbim të infrastrukturës së munguar dhe tejet të nevojshme për kontekstin tonë – me synim vet-qëndrueshmërinë.

Çfarë na nevojitet?

Restaruimi i dyerve, dyshemesë dhe pllakave do të jetë vetëm disa prej aspekteve që do të ndihmojnë në adaptimin e hapësirës në galeri. Pasi t’i kemi përfunduar ndërhyrjet e para, do të ketë nevojë për pajisje dhe instalim të ndriçimit, te paneleve e inventarit të nevojshëm. Ne synojmë që ta funksionalizojmë këtë hapësirë që  do ta bëjnë galerinë të qasshme dhe njëkohësisht t’i përgjigjet nevojave të komunitetit artistik për ekspozim të punëve të tyre dhe jo vetëm.

Prandaj ju ftojmë që të na bashkoheni në këtë kampanjë për të dhënë kontributin tuaj që të mundësojmë renovimin e hapësirës për galerinë, t’i japim gjallëri lagjes dhe së bashku të kontribuojmë në pasurimin e jetës kulturore në vend.

Buxheti

Gjithsej € 15 000,00

Filming & editing: Leart Rama
K2.0 video: Trëndelinë Halili