Campaign Story

Shkolla “Mazllum Këpuska”

Shkolla fillore “Mazllum Këpuska” ka filluar punën në vitin 1954. Në vitin 1962 vazhdoj punën në hapësirat ku edhe tash funksionon. Ndërsa në vitin 1964 u themelua zyrtarisht, dhe mori emrin “Mazllum Këpuska”.

Në vitin akademik 2017-2018, kjo shkollë numëron 460 nxënës nga klasat VI deri IX, në gjithsejt 18 paralele. Aktualisht, këta nxënës mund të përfitojnë shumë pak nga një bibliotekë e improvizuar dhe e papërshtatshme për nevojat e tyre, si nga ana infrastrukturore, por edhe nga ana e materialeve letrare, sipas planprogramit mësimor dhe jashtë tij. Kjo gjendje dëshpëruese derivon si pasojë e mungesës së fondeve financiare nga shkolla.

Nëse edhe më tej nuk ndërmirren masa, biblioteka e kësaj shkolle do të vazhdojë të jetë një hapësirë që nuk premton miqësi me nxënësit.

Çfarë kemi ne si qëllim?

Ky projekt ka qëllime tërësisht jo-profitabile, me synimin që të shndërrojmë bibliotekën aktuale të shkollës “Mazllum Këpuska” në një ambient miqësor, të plotësuar me libra që inkurajojnë leximin.

Ne synojmë që me përkrahjen financiare të pranuar nga kjo fushatë, së pari të rregullojmë hapësirën ekzistuese ku gjendet biblioteka, duke e bërë atë më ftuese për ngjarjet që lidhen me leximin dhe shpërndarjen e njohurive, si burim esencial i të nxënurit dhe diturisë.

Të gjitha këto tentojnë për një nismë që shkolla së bashku me nxënësit të zhvillojnë klubet e leximit me aktivitete të vazhdueshme gjatë gjithë vitit shkollor, duke e vendosur kështu librin si asistent të përhershëm gjatë procesit edukativ dhe arsimor.

Kush jemi ne?

Në bashkëpunim të ngushtë me udhëheqësinë e shkollës “Mazllum Këpuska”, përkatësisht me drejtorin e shkollës, z. Arbënor Pozhegu, ekipi që mbështet këtë fushatë dhe do të kujdeset për implementimin e saj përbëhet nga ish-nxënës të kësaj shkolle.

Ky ekip udhëhiqet nga Jonila Batusha, një prej nxënëseve më të dalluara të këtij institucioni arsimor, e cila muaj më parë në një punëtori kartolinash të organizuar nga KosovaIdeas dhe BONEVET, shprehu me shumë kreativitet dëshirën e saj që në shkollë të ketë një bibliotekë sipas nevojave të tyre.

Çfarë kemi nevojë?

Ne kemi nevojë për ristrukturimin dhe zgjerimin e hapësirës ekzistuese të bibliotekës (nga hapësira prej 27.80m2 në 41.25m2), duke krijuar një ambient të përshtatshëm leximi, i cili do të shërbejë edhe si një hapësirë bashkëpunuese për punë në grupe pas orarit mësimor.

Kjo zgjidhje konsiston në modelimin e rafteve për sistemimin e librave deri në lartësinë e plafonit, në mënyrë që të përfitojmë sa më shumë hapësirë për tituj plotësues (të rinjë). Përpos rafteve, hapësira do të plotësohet edhe me këndin për lexim në grup në formë rrethore, ku nxënësit do të shkëmbejnë mendimet, njohuritë dhe idetë e tyre, një tavolinë pune (për individë apo grupe) me ulëse adekuate, si dhe tavolina e punës së bibliotekistes, e cila do të ketë një kompjuter për administrimin dhe regjistrimin e librave e poashtu do të ofrojë edhe material në formë digjitale.

Hapësira do të ngjyroset në nuanca të ngrohta dhe do të ketë ndriçim të përshtatshëm. Këto punime do të realizohen me ndihmën e bizneseve lokale të ish-nxënësve të kësaj shkolle si dhe të krijuesve të BONEVET.

Në fund, por më e rëndësishmja, biblioteka e shkollës do të pasurohet me më shumë se 250 libra/tituj, që parashihen në planprogramin mësimor, si dhe materiale tjera që do të përzgjedhen me kujdes në bashkëpunim edhe me kërkesat e dëshirat e nxënësve të shkollës.

Si do të ndihmojë përkrahja juaj?